Gid pou vote

Youn nan dwa sitwayen Ameriken genyen ki pi enpòtan se dwa pou l vote. Vote ba w opòtinite pou enfliyanse lavni kominote w.

Vote stickers with American flags.

Kilè ak kikote pou vote

Pifò Eta ak teritwa yo ofri opsyon fleksib pou vote, yon fason ki adapte ak bezwen ou. Men opsyon yo ki gendwa disponib nan Eta w lan.

Vote an pèsòn

Pifò moun ki vote nan Jou Eleksyon dwe vote an pèsòn nan yon biwo vòt. Lè w rive nan biwo vòt la, w ap wè anplwaye biwo vòt eleksyon yo ki la pou ede w. W ap vote lè w fè chwa w sou bilten vòt sou papye a oswa sou aparèy elektwonik.

Chèche konnen kikote biwo vòt ou an ye (an angle). Lè biwo louvri ak fèmen pou biwo vòt yo gendwa pa menm pou tout adrès yo. Tcheke ak biwo eleksyon Eta oswa lokal ou an (an angle) si ou gen nenpòt kesyon konsènan adrès biwo vòt ou an.

Vote pa kourye lapòs ak vote an absans

Sèten Eta òganize eleksyon yon fason pou moun ka vote pa kourye lapòs sèlman. Gen lòt ki pèmèt w mande yon bilten vòt pou vote antank votè ann absans si w pa kapab vote anpèsòn oswa ou pito vote ak yon bilten vòt pa kourye lapòs. Chak Eta gen pwòp direktiv pa yo, kidonk tcheke pou wè si w elijib pou vote pa kourye lapòs nan Eta w (an angle).

Kijan pou voye retounen yon bilten vòt pa korespondans:

  • Pa kourye lapòs: Nan sèten Eta ak teritwa, bilten vòt yo vini ak yon anvlòp retou ki deja peye. Nan lòt Eta, ou dwe ajoute tenm sou anvlòp la anvan ou voye li nan kourye lapòs. Pa bliye make tout enfòmasyon sou anvlòp retou an anvan ou voye li ale.
  • Bwat a lèt (Drop box) oswa an pèsòn: Ou pa bezwen tenm si ou voye tounen bilten vòt ou an nan biwo eleksyon lokal ou an oswa nan yon bwat lèt ofisyèl pou bilten vòt. Anpil moun sèvi ak bwat lèt yo, men anplasman ak disponibilite yo gendwa varye. Tcheke biwo eleksyon lokal (an angle) ou an pou chèche konnen kikote bwat lèt bilten vòt pa korespondans ki pi pre w la ye.

Jwenn plis enfòmasyon sou vote

Jwenn enfòmasyon konsènan bilten vòt ou

Chèche konnen kijan vòt ou enpakte kominote w lan pou w kapab pran yon desizyon byen enfòme.

Anpil biwo eleksyon mete egzanp bilten vòt anliy. Sèten founi tou enfòmasyon anliy oswa nan kourye lapòs konsènan kandida yo ak mezi anplas pou depoze bilten vòt yo. Tcheke wèbsayt eleksyon nan Eta oswa wèbsayt pou eleksyon lokal yo pou jwenn plis enfòmasyon.

Egzijans pyès idantifikasyon votè yo

Chak Eta ak teritwa fikse pwòp règ idantifikasyon pa yo. Nan pifò Eta, ou dwe pote pyès idantite w pou w ka vote an pèsòn epi bay enfòmasyon sou idantite w lè w ap vote pa kourye lapòs. Tcheke egzijans pyès idantifikasyon votè pou Eta pa w la (an angle).

Ou kapab jwenn yon kat idantite nan biwo Department Motor Vehicles, menmsi ou pa kondui. W ap bezwen peye yon frè pou jwenn yon kat idantite, men gen òganizasyon ki gendwa ede w kouvri frè sa a pou jwenn pyès idantifikasyon an.

Ou pa bezwen yon kat enskripsyon votè pou vote.

Sipò nan lang ou pale a

Si Anglè se pa lang prensipal ou epi ou vle vote nan yon lòt lang, ou kapab mande èd. Kontakte biwo eleksyon lokal (an angle) ou an pou chèche konnen ki tip sipò ki disponib nan lang ou, tankou:

  • Enfòmasyon ak materyèl pou vote (tankou bilten vòt) nan lang ou
  • Yon anpwlaye biwo vòt la ki ka kominike avèk ou nan lang ou an (enkli Langaj Siy Ameriken)
  • Yon fanmi oswa yon zanmi ki ka tradui pou w nan biwo vòt la

Aranjman pou jwenn aksesibilite

Si ou gen yon andikap, ou gen dwa legal pou jwenn aksè ak materyèl pou vote, tankou bilten vòt ki ekri angwo lèt owa fòma odyo. Si w ap vote an pèsòn, ou gen dwa tou pou jwenn ekipman pou vote ki aksesib avèk biwo vòt ki aksesib.

Si wèbsayt eleksyon Eta w oswa biwo vòt ou pa aksesib, ou gen opsyon pou mande aranjman pou jwenn aksesibilite. Kontakte biwo eleksyon lokal (an angle) ou si:

  • Ou gen difikilte pou jwenn aksè sou wèbsayt eleksyon Eta w lan
  • Ou pa gen aranjman pou jwenn aksesibilite ou bezwen nan biwo vòt ou an

Si ou kwè ou te viktim diskriminasyon poutèt yon andikap pandan ou t ap vote, rapòte eksperyans ou (an angle) bay Depatman Jistis la.

Jwenn plis oryantasyon an detay sou fason pou vote lè ou gen yon andikap.

Lejislasyon federal pwoteje dwa w genyen pou w vote

Jwenn enfòmasyon sou lwa federal ki pwoteje dwa w genyen pou w vote nan Gid Konnen Dwa w Genyen pou w Vote (an angle) Depatman Jistis la kreye. Gid la disponib an Espayòl tou.

Ou kapab rapòte yon plent bay Depatman Jistis la (an angle) si ou viktim youn nan senaryo sa yo pandan w ap egzèse dwa w pou w vote:

  • Yon moun konteste dwa w genyen pou w vote
  • Ou rete yon zòn kote yo oblije bay dokiman pou vote nan sèten lang, men ou pa resevwa materyèl pou vote ki tradui nan lang ou vle a 
  • Ou pa resevwa okenn aranjman rezonab pou jwenn aksesibilite

Aprann plis sou kouman gouvènman an rasire vòt ou konte komsadwa.

Enskri pou w travay kòm anplwaye nan biwo vòt

Sipòte kominote w lè w travay kòm anplwaye biwo vòt k ap touche. Anplwaye biwo vòt yo gen obligasyon diferan depandan kote yo abite a. Anpil biwo eleksyon lokal gen anplwaye biwo vòt ki fè aktivite sa yo:  

  • Enstale biwo vòt la
  • Akeyi votè yo 
  • Konfime enskripsyon votè yo 
  • Distribye bilten vòt  
  • Ede votè yo itilize aparèy vòt la 
  • Esplike pwosedi pou vote a

Antank anplwaye biwo vòt, y ap peye w pou tan ou fè ap travay la. Peman yo depann sou adrès la.
Jwenn plis enfòmasyon sou fason pou vin yon anplwaye nan biwo vòt (an angle).

Konnen ki dwa elektoral ou genyen