Antank nouvo sitwayen ameriken, ou gen opòtinite pou patisipe nan eleksyon ameriken yo. Vote se yon dwa ou genyen — epi yon bon fason pou pote chanjman nan kominote w.
Premye pa a se enskri pou vote
Anvan ou kapab vote, ou dwe enskri. Yon fwa ou fin enskri, ou kapab vote nan eleksyon Eta a, lokal ak federal yo.
Ou gendwa te deja enskri pou vote nan seremoni natiralizasyon w lan. Si ou pa sèten, ou ka tcheke estati enskripsyon w anliy (an angle) oswa ale nan biwo eleksyon lokal ou (an angle). Ou gendwa te resevwa tou yon kat enskripsyon votè pa kourye lapòs. Si non w oswa adrès ou te chanje, fò w mete enskripsyon votè w la ajou.
Si ou poko enskri, pa tann! Ou ka enskri pou vote nenpòt kilè aprè seremoni natiralizasyon w.
Asire w ou fin sitwayen ofisyèlman anvan ou enskri.
Si ou poko yon sitwayen ameriken, tann anvan ou enskri. Moun ki pa sitwayen tankou rezidan pèmanan legal yo, pa ka vote nan eleksyon federal, nan Eta a ak nan pifò eleksyon lokal yo. Enskri pou vote anvan ou vin yon sitwayen ameriken kapab enpakte negativman sitwayènte w.
Kijan pou enskri pou vote
Ou gen chwa sou fason ou ka enskri
Chak Eta ak teritwa fikse pwòp règ li sou enskrispyon pou vote. Ou gendwa kapab:
- Enskri anliy: Pifò Eta yo ofri enskripsyon anliy. Chwazi Eta oswa teritwa w pou chèche konnen si w ka enskri sou Entènèt.
- Enskri pa kourye lapòs: Ou kapab telechaje epi enprime Fòm Enskripsyon Nasyonal Votè k ap Vote pa Kourye Lapòs (an angle - National Mail Voter Registration Form) pou itilize nan tout Eta eksepte New Hampshire, North Dakota, Wisconsin ak Wyoming. Fòm lan disponib nan plizyè lang.
- Enskri an pèsòn: Ou kapab enskri an pèsòn nan biwo eleksyon Eta oswa lokal ou an (an angle) oswa nan biwo Department Motor Vehicles Eta w la.
Chèche konnen dat limit enskripsyon yo
Pa gen okenn dat limit enskripsyon nasyonal votè. Nan sèten Eta, dènye jou pou enskri a se 30 jou anvan Jou Eleksyon an. Nan lòt Eta yo, ou kapab enskri Jou Eleksyon an. Jou Eleksyon se nenpòt eleksyon (eleksyon lokal, Eta oswa eleksyon nasyonal). Jwenn dat limit enskripsyon votè pou Eta w (an angle).
Jwenn enfòmasyon sou eleksyon amerikèn yo
Konprann vòt ou an onivo lokal ak nasyonal
Eleksyon Eta a ak lokal yo fèt pandan tout ane a. Onivo Eta a, ou gendwa vote pou eli gouvènè, jij oswa manm lejislati Eta a. Lokalman, ou gendwa vote pou majistra vil la oswa lòt ofisyèl lokal. Kandida ki genyen yo pran desizyon sou bagay tankou bidjè transpò piblik ak bidjè lekòl nan kominote w lan. Desizyon sa yo enpakte lavi toulejou w.
Chak kat (4) lane, eleksyon prezidansyèl la deside kimoun ki pral lidè Etazini. Gen primè Eta ak lokal yo epi konvansyon (caucuses) yo (an angle) ki òganize anvan eleksyon jeneral la pou chwazi kandida yo pral nonmen pou eleksyon prezidansyèl la. Eleksyon jeneral (an angle) deside kimoun ki pral kandida sa a. Chak Eta gen pwòp pwosesis ak règ pou vote pa l.
Eleksyon kongresyonèl yo deside kimoun ki pral reprezante w nan Kongrè. Kongrè gen de (2) pati ladann: Chanm Reprezantan Etazini (U.S. House of Representatives) ak Sena Etazini. Manm Chanm Reprezantan an reprezante distri yo andedan yon Eta. Yo eli chak de (2) lane. Manm Sena Etazini a reprezante tout Eta yo. Manda yo se pou sis (6) lane, men se pa tout ki eli anmenmtan. Sèten senatè epi tout manm Chanm Reprezantan Etazini yo patisipe kòm kandida nan eleksyon (oswa reyeleksyon) pandan eleksyon mi-manda (midterm elections). Eleksyon mi-manda yo dewoule nan mitan manda 4 lane chak Prezidan.
Jwenn enfòmasyon konsènan bilten vòt ou
Chèche konnen kijan vòt ou enpakte kominote w lan pou w kapab pran yon desizyon byen enfòme.
Anpil biwo eleksyon mete egzanp bilten vòt anliy. Sèten founi tou enfòmasyon anliy oswa nan kourye lapòs konsènan kandida yo ak mezi anplas pou depoze bilten vòt yo. Tcheke wèbsayt eleksyon nan Eta oswa wèbsayt pou eleksyon lokal yo pou jwenn plis enfòmasyon.
Enskri pou w travay kòm anplwaye nan biwo vòt
Sipòte kominote w lè w travay kòm anplwaye biwo vòt k ap touche. Anplwaye biwo vòt yo gen obligasyon diferan depandan kote yo abite a. Anpil biwo eleksyon lokal gen anplwaye biwo vòt ki fè aktivite sa yo:
- Enstale biwo vòt la
- Akeyi votè yo
- Konfime enskripsyon votè yo
- Distribye bilten vòt
- Ede votè yo itilize aparèy vòt la
- Esplike pwosedi pou vote a
Antank anplwaye biwo vòt, y ap peye w pou tan ou fè ap travay la. Peman yo depann sou adrès la.
Jwenn plis enfòmasyon sou fason pou vin yon anplwaye nan biwo vòt (an angle).
Sipò pou nouvo sitwayen yo
Gen gwoup ki la pou ede nouvo sitwayen yo ak divès aspè lavi Ozetazini, tankou pwosesis vote. Ou kapab:
- Kontakte Office of New Americans (Biwo pou Nouvo Ameriken) yo ki nan Eta w oswa nan rejyon lokal ou.
- Jwenn yon sant alfabetizasyon lokal.
- Jwenn gwoup lòt nouvo sitwayen ki gen eksperyans ak eleksyon amerikèn yo.
Sipò nan lang ou pale a
Si Anglè se pa lang prensipal ou epi ou vle vote nan yon lòt lang, ou kapab mande èd. Kontakte biwo eleksyon lokal (an angle) ou an pou chèche konnen ki tip sipò ki disponib nan lang ou, tankou:
- Enfòmasyon ak materyèl pou vote (tankou bilten vòt) nan lang ou
- Yon anpwlaye biwo vòt la ki ka kominike avèk ou nan lang ou an (enkli Langaj Siy Ameriken)
- Yon fanmi oswa yon zanmi ki ka tradui pou w nan biwo vòt la
Lejislasyon federal pwoteje dwa w genyen pou w vote
Jwenn enfòmasyon sou lwa federal ki pwoteje dwa w genyen pou w vote nan Gid Konnen Dwa w Genyen pou w Vote (an angle) Depatman Jistis la kreye. Gid la disponib an Espayòl tou.
Ou kapab rapòte yon plent bay Depatman Jistis la (an angle) si ou viktim youn nan senaryo sa yo pandan w ap egzèse dwa w pou w vote:
- Yon moun konteste dwa w genyen pou w vote
- Ou rete yon zòn kote yo oblije bay dokiman pou vote nan sèten lang, men ou pa resevwa materyèl pou vote ki tradui nan lang ou vle a
- Ou pa resevwa okenn aranjman rezonab pou jwenn aksesibilite
Aprann plis sou kouman gouvènman an rasire vòt ou konte komsadwa.